張晨：浪費時間的 email 罵戰

喺工作之上，所有打工仔固然係全情投入，但佢哋辛酸嘅背後，都有好多嘢，其實係浪費時間之舉。

其中一樣就係「EMAIL罵戰」，喺商業社會之上，「EMAIL罵戰」有一個特色，就係必然用「英文」。

感覺上高級少少，對比起「街市阿姐鬧交」亦都截然不同。

街市阿姐可以出晒四字真經，咩「x你老母」、「X家富貴」、「小X死你」等等，講嘅係氣勢，務求以聲量震懾全場，將「小你」化為道理，感覺就好似泥漿摔角咁。

而Email罵戰，講求嘅係「層次感」，不帶半句粗言，但成篇由頭咀嚼，勁過萬句穢語。

雖然甚麼「Fxxk You」全部唔會出現。不過佢哋只要喺Email上啟用「CC」功能，就足以令件事難聽過粗口。

(CC，Carbon Copy，即係副本。簡單解釋係當佢喺Email嘅「副本」入面加埋你老闆Email，咁老闆都會收到嗰封Email。)

例如你有啲嘢做漏咗，某啲人用Email向你作出攻擊，首先佢會簡述件事，再將你嘅「過失」擺喺入面，然後「假設」一個嚴重後果，最後兜返話呢家冇出事，因為佢幫你補咗鑊。每段英文都有禮貌但暗藏殺機。

當然，封Email佢會「好唔小心地」CC埋畀你老闆、你阿頭、你同事、甚至畀你老闆個老闆。到時全世界都知你做錯嘢，你連反撃機會嘅機會都冇。

佢可能只係坐你前幾行，不過佢係唔用口講，鍾意以Email作武器，等你冇好日子過。

Fine，遇到呢啲事，你就要諗點覆，因為唔覆等於默認，啞巴吃黃蓮；有苦自己知！終於，你又用半粒鐘諗咗封絕世Email，中間仲Set定啲陷阱畀佢踩，而理所當然地，你都CC晒畀唔同Dept嘅人。

來來回回，翻來覆去，你全日就喺度玩Email遊戲。

唔止公司內部戰爭，有時兩間公司合作，呢種「Email罵戰」更加係平常事，你就鬧下個Target唔係咁Set；佢就鬧下個Quotation唔準，一時你話佢Timeline錯；一時佢話你啲嘢未Approve就出街。

成班好似喪屍咁，上住Google Translate睇下人哋點鬧佢，一邊諗下點鬧返人。用一堆絢麗脫俗嘅英文，構成一封又一封表面讚嘆，實情毒到喊嘅Email。

有時，你都唔想玩呢啲無聊嘅「辦公室遊戲」，可惜，即使你故作遠觀，旁人都係會送你一刀。

唔還拖就變「送你一程」；
還拖，就「遊戲開始」。

唉，這就是打工仔。

原文刊於張晨（鳥不起）facebook，獲作者授權轉載。

標題經TOPick 編輯修改，原題為〈用Email 鬧交可能係史上最浪費時間嘅事〉。